"Artoaren erabilerak" familientzako tailerra Gipuzkoako Erroten Eguna dela eta

Igartubeiti Baserri Museoak "Artoaren erabilerak" familientzako tailerra antolatu du, Gipuzkoako Erroten Eguna dela eta, maiatzak 28an, 16:30etatik 18:30etara. 

Gipuzkoako Erroten Eguna ospatuko da lehen aldiz, Maiatzaren 8an, igandea, eta horrekin batera, ondare-elementu horien inguruko jarduera programa zabala egingo da, horiek balioan jarri eta jendeari ezagutarazteko.

Gipuzkoako Erroten Eguna ospatzeko ekimena Ihurrita Errota elkarteak bultzatu du, eta lurraldeko hainbat elkarte, udalerri eta eragileren laguntza izan du. Jendeari errotak hobeto ezagutzeko eta ondare-elementu horri lotutako alderdi ezberdinak ulertzeko aukera ematea du helburu: historia eta kultura, ingurumena, teknologia, energia desberdinen erabilera eta gure gizarteak eta paisaiak izan dituzten aldaketak.

Errotak gure ondare historiko, teknologiko, antropologiko eta etnografikoaren parte dira. Mende askotan zehar garrantzi handia izan dute Gipuzkoako garapen sozial, ekonomiko eta industrialean. Lurraldearen antolaketaren eta giza jardueraren adierazpenik esanguratsuenetako bat dira, ondare adierazgarria, gizakiak bere ingurunearekin dituen harremanei buruz hitz egiten duena, eta gure kulturaren eta historiaren parte diren iraganeko bizimoduei buruz hitz egiten duena.

Lurraldearen orografiari eta klima euritsuari esker, errotaren industria garatu da, mendeetan zehar energia hidraulikoa baliatzen baitzuen komunitateari zerbitzua ematen zion hainbat zereal mota ehotzeko. Arto amerikarraren etorrerak eta gure lurraren ezaugarrietara ondo egokitzeak euskal geografiako bazter guztietara zabaldu ziren erroten kopurua biderkatu zuen, eta hainbat mendetan zehar beren jarduerari eutsi zioten, pixkanaka bigarren maila batean geratzen joan ziren arte.

Gaur egungo erroten panoramak ez du zerikusirik duela mende batzuetako egoerarekin, ezta Antxon Agirre Sorondok duela 40 urte "Tratado de Molinología" lanean bildutako 600 errota baino gehiagorekin ere. Iraganeko garrantzi ekonomikoa galduta, errotek ondare balio berria hartzen dute, bizimodu bati eta gizarte baten jakintzen transmisioari estuki lotutako jarduera batena.

40 jarduera baino gehiagok publiko guztiarentzako egitaraua osatzen dute, besteak beste, errotagintza topaketa, hitzaldiak, bisita gidatuak, haur eta familientzako tailerrak, martxak, erromeriak, ate irekien egunak... Zehazki, Aia, Altzo, Amezketa, Antzuola, Arama, Asteasu, Ataun, Azkoitia, Azpeitia, Beasain, Beizama, Bergara, Deba, Donostia, Eibar, Errenteria, Eskoriatza, Ezkio-Itsaso, Gabiria, Irun, Larraul, Legazpi, Mutiloa, Oiartzun, Oñati, Ormaiztegi, Tolosa, Usurbil, Zaldibia, Zegama, Zerain, Zizurkil eta Zumaian egingo dira jarduerak.

Apirilaren 29an hasiko dira Gordailuan bisita gidatu batekin eta Igartzako errotan zabalduko den erakusketarekin, eta apirilaren 30a egun seinalatuetako bat izango da, Larraulen egingo den errotagintza topaketarekin, non goizean zehar edizio honetako parte hartzaileak bilduko diren. San Telmon "Gipuzkoako errotak. Atzo eta gaur" hitzaldia ere eskainiko da. 

Igartubeiti Baserri Museoan eskainiko dugun "Artoaren erabilerak" tailerrean, parte hartzaileek artoa landatuko dute Igartubeitiko baratze ekologikoan. Ondoren, artoaren hostoen, artaburuen, aleen erabilerak ezagutuko dituzte. Artoen hosto eta aleekin eguzkilorea egingo dute, gero etxera eramateko.

Gipuzkoako Erroten Eguneko egitaraua (pdf 1.292Kb)