“Barne begiradak II: Lurraldea, tradizioa eta transmisioa” argitalpena
Azken urteotan, Igartubeiti Baserri Museoak zeregin aktiboa izan du bere inguruko lurraldeko erronkei aurre egiteko. Horretarako, kultura-ondareari lotutako arte-praktikei eusten dieten testuinguruak sortu ditu, bizimodu jasangarriagoak aldarrikatu ditu eta komunitate-lotura berriak eraiki ditu.
Erronka horiei erantzun zuzena emateko hiru jarduera garatu ditu Igartubeitik, PATRIM 4.0 egitasmoaren baitan: Asier Gogortzaren egonaldi artistikoa, “Jakintzen hibridazioa” programa eta “Lurraldea, tradizioa eta transmisioa” topaketa.
Barne Begiradak argitalpenaren bigarren edizio honek, ondarearekin eta sorkuntza garaikidearekin lotutako landa-eremuen kontzeptuari buruzko gogoeta berriak eskaintzen dituzten egileen ikuspegiak biltzen ditu.
Bigarren argitalpen honetan, testu guztiak hari gidari berak lotzen ditu: artisautza eta praktika artistikoa, ondarea berritzeko eta eraldatzeko prozesu gisa.
Barne Begiradak II argitalpenak, beren esperientziatik eta jardunetik abiatuta, gai hauen inguruko gogoeta berriak eskaintzen dituzten egileen ikuspegiak biltzen ditu:
- Ondareak eta museoek etorkizuna sortzen dutenean: artisautza, lurraldea eta tokiko garapena (Jordi Abella. Antropologoa eta Ecomuseu de les valls d'Àneu museoko zuzendaria).
- Saskigintza. Lanbide bat baino gehiago (Itziar de la Granja. Zumitzi Saskigintzako arduraduna).
- Eskuek ez dakite dikotomia zer den (Laurita Siles. Artista eta Mutur beltz proiektuaren sortzailekidea).
- Set Andròmines i quatre artistes (Asier Gogortza. Artista eta argazkilaria).
- Argazkigintzaren magia: iraganeko paisaietan oraina kokatzeko aukera (Amaia Dorronsoro. Ezkio-Itsasoko Herri Eskolako irakasle taldeko kidea).
Argitalpena euskaraz, gaztelaniaz eta ingelesez dago eskuragarri. Diseinua irisgarritasun neurriak betez egin da, irakurketa errazteko.